Alimus riekti hilggui sivahusaid áššiin, mat guske sápmelaččaid guolástanvuoigatvuođaid
Alimus riekti (KKO) lea hilgon guovtti áššis sivahusaid, mat guske báikkálaš sápmelaččaid vuoigatvuođaid guolástit Deanu čázádahkii gullevaš Ohcejogas ja Veahčajogas. Dáinna láhkái KKO doalahii Lappi gearretrievtti čovdosiid.
Sivaheaddji gáibidii nuppi áššis báikkálaš sápmelažžii ráŋggáštusa guolástanrihkkumušas. Almmái lei bivdán luosa njáŋggofirpmiin Ohcejogas lobálaš guolástanáigodaga olggobealde borgemánus jagi 2017. Guollebivdu dan áigge borgemánus lei vuostá stáhtaráđi láhkaásahusa, mii dalle lei fámus. Dát láhkaásahus guoskkai guollebivddu Deanu čázádaga oalgečázádagain.
KKO árvvoštalai, ahte guolástanáigodahkii guoski láhkaásahus, mii lei fámus dagu áigge, lei ruossalasvuođas báikkálaš sápmelaččaid vuođđolágas dorvvastuvvon vuoigatvuođaiguin. Láhkaásahusa njuolggadus ii vuođđolága vuođul guoskaduvvon, ja sivahus guolástanrihkkumušas hilgojuvvui.
Nuppi áššis sivaheaddji gáibidii njealji báikkálaš sápmelažžii ráŋggáštusa lobihis guollebivddus. Sii ledje guolástan vuokkain ja stákkuin stáhta čázádatguovllus Veahčajogas Meahciráđđehusa lobi haga.
KKO árvvoštalai, ahte daguid áigge jagi 2017 guolástanlága mielde luosa ja dápmoha goargŋunguvlui gáibiduvvon sierra guolástanlohpi ja dasa gullevaš lohpegeavadagat dagahedje nu mearkkašahtti ráddjehusaid báikkálaš sápmelaččaide, ahte láhkaásaheami guoskadeapmi livččii čielgasit ruossalasvuođas sidjiide vuođđolágas dorvvastuvvon vuoigatvuođaiguin. Guolástanlága njuolggadus guđđojuvvui seamma láhkái vuođđolága vuođul guoskatkeahttá, ja sivahus lobihis bivddus hilgojuvvui.
Áššit gieđahallojedje KKO:s ovdamearrádusváidimin, maiguin sivaheaddji ozai nuppástusa gearretrievtti čovdosiidda hoavvarievtti sadjái njuolga alimus rievttis.
Lassedieđut: KKO gulahallan, kko.viestinta(at)oikeus.fi, t. 02956 40060, 02956 40052
Čovdosiid KKO:2022:25 ja KKO:2022:26 (R2019/424 ja R2019/425, 13.4.2022) sáhttá diŋgot alimus rievtti registrerenkantuvrras, tel. 029 56 40050, korkein.oikeus(at)oikeus.fi.
Čovdosiid jorgalusat davvisámegillii: AR:2022:25 ja AR:2022:26
Julkaistu 13.4.2022