Ovdasiidu » Riektegeavvan alimus rievttis

Riektegeavvan alimus rievttis

Dain áššiin, main nuppástusohcci dárbbaša váidinlobi alimus riektái, ášši gieđahallamis galgá earuhit guokte muttu, váidinlohpemuddu ja váldoášši čoavdinmuddu. Váidinlohpi čovdojuvvo áššemeannudeami vuođul guovttelahtu čoahkus. Dát dárkkuha dan, ahte guokte lahtu mearrideaba váidinlobi mieđiheamis áššemeannudeaddji válmmaštallama ja čoavdinevttohusa vuođul. Muhtun diliin váidinlobis mearideami sáhttá sirdit čohkkui , masa gullet guovtti sadjái golbma lahtu. Jos váidinlohpeohcamuš hilgojuvvo, ášši gieđahallan nohká dasa ja hoavvarievtti duopmu báhcá bissovažžan.

Jos váidinlohpi mieđihuvvo, váldoášši dahjege váidagis ovdanbuktojuvvon gáibádusat čovdojuvvojit viđa lahtu čoahkus. Alimus riekti bargá váldoáššečovdosage áššemeannudeami vuođul, mii dárkkuha dan, ahte áššemeannudeaddji válmmaštallá ášši ja iežas buohta vástida bargon čovdosis. Alimus rievtti čovdosa várás čielggaduvvojit áššegirjjiid ja lágaid lassin riektegeavadagat, lágaid ovdabarggut, vuoigatvuođagirjjálašvuohta sihke riikkaidgaskasaš seađáhusat.

Jos čoavdinláhkai gážaldat lea prinsihpalaččat dehalaš dahje alimus riekti hálida nuppástuhttit ovdal addojuvvon ovdačovdosa, ášši čovdojuvvo gievruduvvon juhkosis, (11 lahtu) dahje dievasčoahkkimis (buot lahtut). Riektehálddahusa guoski áššit, earet eará duopmáriid nammadanevttohusat, mearriduvvojit dievasčoahkkimis.

Alimus rievtti áššemeannudeaddjit, geaid virgenamahusat leat vuoigatvuođačállit dahje áššemeannudeaddji ráđđeolbmot, válmmaštallet alimus rievtti mearrideami várás boahtti áššiid ja ovdanbuktet daid čoahkkimis. Áššemeannudeaddjit maiddái eanáš fuolahit oktavuođadoallamis áššáiosolaččaide ja riektegeavvama olgguldas jođu lágideamis ja áššáiosolaččaide ráhkaduvvon doaimmahusgirjjiid válmmaštallamis.

Alimus rievttis áššit čovdojuvvojit dábálaččat girjjálaš materiála vuođul. Alimus riekti sáhttá goittotge doaimmahit njálmmálaš gieđahallamiid, main gullat áššáiosolaččaid, duođašteaddjiid ja áššedovdiid persovnnalaččat. Njálmmálaš gieđahallamat leat maiddái álbmogii ráhpasat. Alimus riekti sáhttá doallat maiddái geahčalmasa, ovdamearkan oahpásmuvvamiin riektegeavvama čuozáhahkan leahkki báikái.

 
Julkaistu 2.9.2014