Doaimmat

Alimus riekti geavaha alimus duopmoválddi riido- ja rihkusáššiin sihke gohcá láhkaollašuhttima iežas doaibmasuorggis. Alimus rievtti guovddáš bargun lea addit ovdamearrádusaid dakkár gažaldagain, maidda láhka ii atte čielga vástádusa. Ovdamearrádusain addojit vuoigatvuođarávvagat boahtti seammasullasaš diggeriidduid várás ja figgojuvvo sihkkarastot, ahte duopmostuolut eará bealde riikka dulkojit lága seamma láhkai.

Alimus riektái sáhttá váidit hoavvarivttiid čovdosiin, gearretrivttiid eanariektin addin čovdosiin sihke muhtun márkanrievtti ja oadjorievtti čovdosiin. Eaktun váidaga dutkamii lea, ahte alimus riekti mieđiha nuppástusohccái váidinlobi .

Ovdamearráduslundosaš áššiin sáhttá jo gearretrievtti čovdosiidda ohcat nuppástusa njuolgga alimus rievttis. Eaktun dallege lea, ahte alimus riekti mieđiha váidinlobi.

Hoavvarivttiid vuosttas riektedássin addin čovdosiin sáhttá dábálaččat váidit alimus riektái váidinlobi bivddekeahttá.

Alimus riekti čoavdá maiddái erenoamáš nuppástusohcama guoski áššiid. Alimus riekti sáhttá burgit dahje sihkkut duopmostuoluid loahpalaš dahjege lágafámu ožžon čovdosiid riektegeavvangeavlli 31 logus máinnašuvvon ákkaid vuođul. Alimus riekti sáhttá máhcahit áššáiosolažžii dán massin mearreáiggi.

Alimus riekti addá čealkámušaid dásseválddi presidentiii árpmihanáššiin sihke vuoigatvuođaministeriijai rihkolaččaid olgoriikkaide luohpadeami guoskavaš áššiin. Alimus riekti addá bivddedettiin dásseválddi presidentii čealkámuša riikkabeivviid dohkkehan lágain sihke Ålándda eanangoddebeivviid dohkkehan eanangoddelágain. Alimus riekti sáhttá maid iehčanasat evttohit stáhtaráđđái lága ásaheami dahje nuppástuhttima. Alimus riekti sáhttá lassin addit čealkámušaid láhkaevttohusain.

Alimus rievtti doaimmain mearriduvvo eanáš oasis Suoma vuođđolágain, lágas alimus rievttis sihke riektegeavvangeavllis.Alimus riekti lea maid nannen alcces bargoortnega.

Hálddahuslága geavahanáššis alimus mearridanválddi geavaha alimus hálddahusriekti.