Suoma Vuođđolága mielde alimus riekti geavaha alimus duopmoválddi riekteáššiin.

Alimus rievtti dehalamos doaibma lea ovdačovdosiid addin. Ovdačovdosiiguin stivrejuvvo eará láhkaollašuhttin. Hoavvarivttiid, eanarivttiid ja muhtun gearretrivttiid, oadjorivttiid ja márkanrivttiid čovdosiin sáhttá váidit alimus riektái, jos alimus riekti mieđiha váidinlobi.

Alimus riekti sáhttá burgit duopmostuoluid loahpalaš dahjege lágafámu ožžon duomuid riektegeavvangeavlli 31 logus máinnášuvvon ákkain. Alimus riekti dutká muhtun riektegeavvanmeannudan feaillain dáhkkon guoddalemiid. Alimus riekti sáhttá muhtun dáhpáhusain máhcahit áššáiosolažžii dán massin mearreáiggi.

Alimus riekti addá čealkámušaid dásseválddi presidentii árpmihanáššiin sihke vuoigatvuođaministeriijai rihkolaččaid olgoriikkaide luohpadeami guoskavaš áššiin.

Alimus riekti sáhttá addit čealkámušaid iešguđet muttus leahkki láhkaevttohusain. Dásseválddi presideanta sáhttá bivdit alimus rievttis čealkámuša riikkabeivviid dohkkehan lágain sihke Ålándda eanangoddebeivviid dohkkehan eanangoddelágain ovdal go son nanne daid. Alimus riekti sáhttá maid iehčanasat evttohit stáhtaráđđái lága ásaheami dahje nuppástuhttima.